الكهرباء.. تأديب وتهذيب وإصلاح..!

آخر كلام
بقلم الصحفى الكبير : محسن حسنين

بصراحة اللى إخترع طريقة حساب إستهلاك الكهرباء “إيديه تتلف فى حديد”…!
ففى أيام الحر اللى مايعلم بها إلا ربنا عز وجل..غلطت غلطة عمرى وفتحت جهاز التكييف..وعينك ماتشوف إلا النور..!
ألف ملطوش عقوبة فورية.. مع زيادة سعر الكيلو إلى حوالى 3جنيهات .. وكان ناقص يحطونى على الخازوق زى ما عملوا مع سليمان الحلبى بعد ماقتل كليبر..!
جرى إيه ياحكومة ..؟! دا أنا دفعت معاشى كله لبتوع الكهربا.
معاشى اللى هو أقل من مرتب أى فراش فى الحكومة..رغم خدمتى لقضايا الوطن والمواطن أكتر من نصف قرن..!
ياحكومتنا الرشيدة..الرحمة حلوة..هو كله ضرب ضرب ..مفيش شتيمة..!
#.. وبعدين إيه كل هذه العقوبات على مستهلكى الكهربا..؟!
فأى قانون فى الدنيا..بيمنع معاقبة المجرم على نفس الجريمة مرتين؛ لكن بتوع الكهربا ؛لإنهم فوق القانون، فبيعاقبوا المستهلكين الغلابة مرة وإتنين وتلاتة… وعشرة..
أما مجلس النواب الموقر فهو مش فاضى غير لمناقشة أسباب إنخفاض أسعارالبيض..اللى واضح إنه ملا البلد اليومين دول..لامؤاخذة..!

# إيه القرف ده..؟!
بتوع الإعلام الرياضى ،اللى أصبح مهنة من لامهنة له ،عاوزين يكرهونا فى الفوز الوحيد اللى حققناه فى كاس العالم..!
اللى بيقول لك إن تلات إجوان مش كفاية ..دا أحنا كان لازم نفوز بأكتر من كدا لإن نيوزيلندا فريق تعبان..!
واللى يقول لك إن محمد صلاح راحت عليه وهناك لعيبة أحرف منه بكتير..!
وحتى الأخ اللى جاب فريق طنطا الأرض ، بيقول إنه حتى لو حسام حسن أخد كاس العالم فهو لا يصلح لإن يكون مدربا..!!
الناس دى ما بتبصش لنفسها فى المراية..؟ّ!
إتلموا بقى وروحوا دوروا لكم على شغلانة شريفة تاكلوا منها عيش بدلا من هذا المشى البطال.. لامؤاخذة..!!

# إعلام فرش الملاية..!
اليومين دول بتوع “إعلام ما قال لى وقلت له ياعوازل فلفلوا”.. نازلين
تقطيع فى هدوم بعض..وبيعيدوا زمن الردح الجميل بتاع الست أم تيتى والست أم لالو والست أم لطفى اللى بتنور وتطفى..!
سؤالى بتاع كل مرة هو : فين وزير الإعلام وفين رئيس المجلس الأعلى للإعلام وفين رئيس الهيئة الوطنية للإعلام..؟!
أنا باأطمن عليهم مش أكتر ..ربنا يخليهم لمصر..!

# الحجاب عامل لهم هسة..؟!
واحد تانى عامل لى فيها روائى ومثقف كبير طالع يهاجم بغضب الحجاب وسنينه واللى لابسينه.. وبيعتبره رجس من عمل الشيطان..!

ياباشا نصيحتى لك.. زى ماقلت الاسبوع اللى فات لصديقك “إياه” : إحنا فى بلد حر عاوز تلبس الحجاب إلبسه مش عاوز تلبسه ماتلبسوش..!!
فيها حاجة دى..؟!