رجعـولنـا بيوتنا طين إحنا لأ مش مبسوطين للشاعر اللواء محمد هيكل

رجعـولنـا بيوتنا طين إحنا لأ مش مبسوطين
رجعوا قلوبنا اللي كانت فيها رحمه وفيها لين

رجعوا الدنيا بطيبتها وخلق كات ماشيه بسيرتها
ناس عرفنا كتير قيمتها و احنا منهم محرومين

رجعـوا الشارع وريحته وكل يوم عدى و فرحته
دا التراب ياما وارى تحته ناس حنونه ومخلصين

العماير لونهــــا راقي بس فيها قلــوب شـراقي
رجعوا الغيط والسواقي و الخضــار و الفلاحين

رجعـــوا النيه السليمه رجعـــوا الناس العظيمه
رجعونا نعيش في خيمه واحنا هنعيش مرتاحين

رجعـــولي مصطبتنــا و الحصيـره و بلكونتنـا
رجعـولي تانـي بيتنـا و القلـــوب متجمعيــن

رجعوا كانونـا وطبيخه رجعوا الكتاب وشيخه
قلبي لسـه من تاريخـه كل ليـله ينــام حـزيـن

رجعــــولي الطشت لما كنت عيــل بتسحمــى
رجعـــولي ناســي لمـه قلبي مش ناسي السنين

رجعـوا كل اللي فاتنــا رجعــوا تانـي حياتنــا
دا احنا حنت ذكرياتنا و دوبنا من كتر الحنين

طب ورب الكــون تعبنا و العذاب ياما دق بابنـا
إحنـا من أيامنـــا شيبنـا والوجـع مالي العينين

رجعوا الناس البريئـه اللي تسند وقت ضيقـه
شوفوا ميت حل وطريقه و رجعــولنـا الطيبيـن
.
.
كلمات
الشاعر اللواء محمد هيكل