# بحر العلم وترعة المفهومية..!

آخر كلام
بقلم : محسن حسنين

بصراحة المسؤول اللى إختار هذا التوقيت ” العبقرى” لرفع أسعار الكهرباء.. إيديه تتلف فى “حديد”..!
فمن الواضح إنه بحر علم وترعة مفهومية.. فقد قرأ الأوضاع والظروف الراهنة الداخلية والخارجية بعبقرية يحسد عليها.
و بسلامته وجد إن دا أفضل توقيت يرفع فيه الأسعار.. والناس قلقانة من حادث دمياط وخايفة من الزلزال وتوابع الزلزال..والدولة كلها بتدعو المواطنين للإصطفاف خلف القيادة السياسية فى هذه الظروف اللى مايعلم بها إلا ربنا..!
بصراحة ..المسؤول دا لازم ياخد “إستمارة سكة”..ويدور له على مكان تانى يستوعب عبقريته اللى ما حصلتش..!

# محتاج “لطامة بالكهربا”..؟!
بتوع إعلام ماقال لى وقلت له ياعوازل فلفلوا بيتطاولوا على الشعب وبيقولوا كلام لازم يتحاسبوا عليه ..
واحد من يومين طالع يقول إن الشعب الصينى جاع وصبر وأكل خفافيش من أجل عيون الإصلاح الإقتصادى؛ لكن الشعب المصرى بيتدلع ومش عاوز يستحمل ولا يصبر ..!
يعنى أذكى إخواته مش مكفيه الغلا والكوا اللى الناس عايشاه..دا عاوزهم ياكلوا خفافيش كمان..!
أما “ساقط التوجيهية” فبيقول إن الشعب هو سبب الأزمة الإقتصادية.. وإن الكلام دا هايتحاسب عليه قدام ربنا..!
وواحد تانى بعد مادافع عن رفع أسعار الكهربا بيقول : إشتمونى..فأنا تصدقت ب”عرضى”..!
عرضه إيه اللى ها يتصدق به ..؟!
أنا أعرف إن الواحد بيتصدق بكولدير مية على روح الوالد والوالدة..إنما يتصدق بعرضه فدى جديدة لنج ..!
سؤالى المع لوزير الإعلام ورئيسى المجلس الأعلى للإعلام والهيئة الوطنية للإعلام:
إنتم سايبن الناس دى بتستفز الشعب وبتهينه ليه..؟!
# مليون تحية للدكتور إبراهيم حرب مدير مستشفى العلمين الذى يدير العمل بهدوء وإحترافية عالية من خلال تقسيم أطقم المستشفى لفرق تقوم بخدمة المرضى بكفاءة وسرعة على مدار الساعة ..
بالمناسبة الدكتور حرب يدير العمل ويوجه الأطقم من مكتب صغير جدا حوله لخلية نحل.
ياريت أصحاب المكاتب المكيفة يتعلموا من تجربة هذا الطبيب الشاب.

# مغارة على بابا..!
ياليلة سودا ..دا سكرتير المحافظة اللى الزبيبة فى وشه فدان ماسابش جريمة إلا وعملها.. رشوة وفساد وتهريب آثار..وغيره وغيره..!
أدفع نص عمرى وأعرف الناس دى بيجيبوها منين..؟!
أكيد من مغارة على بابا..!

# آخر نكتة..!
واحد من “إياهم” بيقول إنه كان بيعانى من المرض والألم؛ لكنه كان بييجى على نفسه وبيتحمل من أجل الناس والبلد..!!
ياااااه..على التضحية..!!
أنا شخصيا شايف إن صحتك أغلى من أى حاجة .. ماتجيش على نفسك ولا صحتك أبدا كفاية تضحيات لحد كدا..أرجوك إرتاح ..إرتاااااااااح.. وريحنا..!